Quintana: Marcando os vice-espazos
Acabo de lere na bitácora do deputado socialista Xosé Manuel Lage que rematou a moi comentada campaña radiofónica “A vicepresidencia de Anxo Quintana…”. Desde que a escoitei a primeira vez pareceume un exemplo máis da teima desde cada unha das áreas do goberno por marcar espazos desde o primeiro momento, sacando peito e tratando de personalizar o máis posible cada un dos logros e pasos dos seus respectivos departamentos.
Entre os episodios máis lamentábeis estivo ao comezo o monopolio fotográfico do presidente Touriño na portada da web da Xunta ou a ruptura das axendas oficiais, enviadas agora por separado desde cada un dos bandos socialista e nacionalista. Sorprende a falta de tacto e diplomacias internas de ambos os dous pés do bipartito.
E chama a atención tamén que comezasen desde tan cedo con certo tipo de detalles: citar só aos persoeiros de cadanseu partido en actos nos que hai representación de PSdeG e BNG, e desaproveitar as oportunidades de iniciativas que implican a varias consellarías para proxectar a imaxe de colaboración e solidez do goberno. Munición gratis para os que insisten en que non hai un goberno, senón dous…
