Planeta Giertych
O abuelete entrañable ese da foto vén de axitar os asentos no Parlamento Europeo, ese foro tradicional e presuntamente tan comedido e sutil nos discursos, defendendo o franquismo e dicindo que: “A esquerda española comportouse como os blocheviques e fusilou catro mil sacerdotes. Grazas a Franco, a Igrexa e o exército o ataque comunista contra a España católica púidose superar”. Estrema dereita en estado puro, Maciej Giertych é un dos líderes da Liga das Familias, partido ultra polaco, que reúne esas dúas características que estes días xuntan un golpe de xentiña por terras de Valencia para o “Encontro Mundial das Familias”, á beira de Bieito XVI: defensa do modelo de familia tradicional unida ao ultracatolicismo.
Alén de que o Europarlamento veña servindo moitas veces para retiro espiritual de vellas glorias dos partidos, Giertych pai ten sucesor en Giertych fillo, cumprido seguidor das súas teorías, incluída belixerancia contra os homosexuais, fortemente perseguidos en Polonia. Gyertich fillo vén de ser nomeado ministro de Educación, triste nova para o ensino…
