Corcoba 2007: cara ao Mundial municipal coruñés
Pola parte de Riazor xógase un partido interesante para o ano que vén e logo da despedida de don Paco. Entre os que desputan o trofeo estará Fernando Corcoba, en pública rifa co convalecente presidente do PP coruñés, o alcalde ferrolán Juncal. En internet xa abrollou un espazo en seu favor: Corcoba 2007 na crecente rede de blogs populares. Non perdere o particular prognóstico electoral para aquela altura, presuntamente baseado en enquisas populares internas e pasado pola cociña blogueira dos seareiros corcobistas: PSOE: 11; BNG: 6; PP: 5; PSP: 4; IU: 1 (O PSP sería o de Corcoba, aínda por definir siglas e o ruxerruxe inclúe a posibilidade dun acordo para adoptar a marca do Partido Galeguista que o vigués Manuel Soto anda ofrecendo polo país adiante).
Do aroma futboleiro dan conta os dous últimos artigos do blog: o primeiro destaca a preocupación do candidato pola posibilidade de que algún veciño poida perder o Mundial. O segundo comenta do presunto episodio protagonizado pola concelleira de Asuntos Sociais coruñesa mentres asistía a un partido de fútbol na escola de seu fillo.
